Sərhəddə son baş verənlər kimin “əl işidir”… – Qərb, yoxsa Rusiya?

Rusiyalı rəsmilər Ermənistan-Azərbaycan şərti sərhəddində baş verən son insidentin Qərbin maraqlarına uyğun olduğuna işarə edirlər.

YeniZamantv.az xəbər verir ki, bunu politoloq Elxan Şahinoğlu qeyd edib.

O xatırladıb ki, Kollektiv Təhlükəsizlik Müqaviləsi Təşkilatının Birləşmiş Qərargah rəisi, general-polkovnik Andrey Serdyukov fevralın 14-də açıqlama verərək Qərbin Bakı ilə İrəvan arasında postmünaqişə dövründə nizamlanmaya təsir göstərməyə çalışdığını bildirib.

E.Şahinoğlu bildirib ki, iki gün sonra oxşar açıqlama Rusiya Federal Təhlükəsizlik Şurasının katibi Nikolay Patruşevdən gəlib:

“Qərb Cənubi Qafqazda vəziyyəti qarışdırmağa, Ermənistan-Azərbaycan həll prosesinə müdaxilə etməyə çalışır” deyən Patruşev bunun bölgədə vəziyyətin gərginləşməsinə səbəb olduğunu vurğulayıb”.

“Əlbəttə, Qərb mələk deyil, Ermənistanı yalançı vədlərlə qorumağa çalışır. Ancaq son insidentdə Azərbaycan hərbçilərinə atəş açan “Yerkrapa” terror təşkilatının üzvləri olub. Onlar isə Birinci Qarabağ müharibəsindən bu yana Rusiyanın hərbi agenturasıyla bağlıdır. Azərbaycanla Ermənistan arasında Qərbin xüsusi vasitəçiliyinə ehtiyac olmadığı kimi, Rusiyanın da fəallığına ehtiyacımız yoxdur. Dövlət başçısı İlham Əliyev Milli Məclisdə andiçmə mərasimində fikrini aydın ifadə edib: “Vasitəçiyə ehtiyacımız yoxdur, gedin işinizlə məşğul olun!”. Bu sözlər həm Qərbə, həm də Rusiyaya aiddir”, – politoloq əlavə edib. /yenisabah.az/