Erməninin torpaq iddialı sualı və Obrayenin dəhliz cavabı

Aprelin 5-də Brüsseldə ABŞ Dövlət katibinin Avropa və Avrasiya məsələləri üzrə müavini Ceyms Obrayen mətbuat konfransı keçirdi.

YeniZamantv.az xəbər verir ki, mətbat konfransında erməni müxalif mediasının təmsilçiləri də öz sualları ilə iştirak edib.

Erməni mediasının sualı Türkiyəyə ərazi iddiası üzərində qurulub: “Ermənistanın müqavimətinə, iqtisadiyyatının inkişafı və çiçəklənməsinə ən böyük maneə Ermənistan sərhədinin Türkiyə tərəfindən düşmənçilik və qeyri-qanuni şəkildə bağlanmasıdır. ABŞ bu maneənin aradan qaldırılmasında və Şərqi Aralıq dənizi sahillərindəki tarixi erməni Kilikiyasından bugünkü Ermənistana nəqliyyat dəhlizinin yaradılmasında hansı rolu oynaya bilər?”

Maraqlıdır ki, suala cavab verərkən Obrayen başqa ölkənin ərazisinə torpaq iddiasının qanunsuz olduğunu xatırlatmayıb və irad bildirməyib. Moderator da sualı olduğu kimi təkrarlamağı lazım bilib.

Obrayen sualı geniş anlamda cavablandırıb və dəhliz məsələsini xüsusi vurğulayıb.

“İqtisadiyyatın şaxələndirilməsi, çeviklik və sərhədlər, Türkiyədən tutmuş Mərkəzi Asiyaya qədər bütün region ölkələri ilə güclü nəqliyyat dəhlizinin yaradılmasının vacibliyi ilə bağlı geniş müzakirələr aparmışıq. Və inanıram ki, bu istiqamətdə hərəkəti görmək üçün böyük bir istək və maraq var.

Bu gün (ABŞ-AB-Ermənistan sammitində – red.) iki konkret məsələ müzakirə olunub: biri, USAİD-in direktoru Samanta Pauer (Brüsseldə Paşinyan həm də Pauerlə görüşmüşdü – red.) belə bir ticarət dəhlizinin mümkünlüyü ilə bağlı danışdı. Orta Asiyadan gətirilən mallar, deyildiyi kimi, Aralıq dənizinə daşınacaq. Malların Qara dənizə çatması üçün başqa mümkün marşrut var (Güman ki, Gürcüstan yolu nəzərdə tutulur – red.). Mərkəzdə yerləşən (Zəngəzur dəhlizi nəzərdə tutulur – red.) belə bir tranzit dəhlizi regionun bütün sakinləri üçün faydalı olardı və onların məhsulları bu cür daşımalardan faydalanacaq sahələri inkişaf etdirməyə imkan verərdi. Ona görə də biz iqtisadi baxışı formalaşdırmağa başlayacağıq və bundan sonra hər bir dövlət, o cümlədən Ermənistan da belə bir dəhlizin layihəsinə – Ermənistandan tikilərsə – hansı töhfəni vermək istədiyinə qərar verməlidir”, – Obrayen bildirib.

O, eyni zamanda qeyd edib ki, bu məsələdə tək deyilik:

“Avropalılar, müxtəlif Avropa qurumları da bu layihəni öyrənməyə başlayıblar. Avropa Yenidənqurma və İnkişaf Bankı məhz bu məsələ ilə bağlı konfrans keçirdi və inanıram ki, səfir Makki (USAİD direktorunun Avropa və Avrasiya Bürosu üzrə müavini Erin Makki – red.) və USAİD-dən olan digər şəxslər orada iştirak ediblər və bu mövzunu davam etdirəcəklər.

Belə bir layihənin əsası regionda sülhün olmasıdır. Bu yeni nəsil layihəsidir, Mərkəzi Asiya ölkələrinin iqtisadiyyatlarını dəyişdirəcək, çünki onların Rusiya və ya Çindən başqa, Azərbaycan, Ermənistan, Gürcüstan və Türkiyəyə qədər tranzit çıxışları olacaq. Bu cür öhdəlik sabitlik və sülh tələb edir. Beləliklə, region ölkələri razılığa gələ bilsələr və öz suveren imkanlarından istifadə etsələr, biz bu layihənin inkişafına hər cür dəstək verməyə hazır olduğumuzu açıqladıq.

Düşünürəm ki, bu, region əhalisi üçün böyük potensiala malik müstəsna layihədir və biz bunu Dövlət katibi Blinken, Prezident fon der Leyen, direktor Pauer və ali nümayəndə Borrellin bu gün dediyi kimi, hər cür dəstəkləyəcəyik”. /axar.az/