“O təşkilat qadın sahibkarlara dəstək üçün yaradılmışdı, ortam sağlam olmadığına görə uzaqlaşdılar”
Sumqayıt şəhər sakini Kəmalə Məmmədli “Azərbaycanda Qadın Sahibkarlığının İnkişafı Assosiasiyası” İctimai Birliyində ciddi problemlər yaşandığını, orada çalışanların hüquqlarının pozulduğunu deyir. Onun sözlərinə görə, 5 il çalışdığı təşkilatdan bu səbəbdən uzaqlaşmaq məcburiyyətində qalıb.
YeniZamantv.az xəbər verir ki, Kəmalə Məmmədli 2019-cu ildən 2024-cü ilə qədər “Azərbaycanda Qadın Sahibkarlığının İnkişafı Assosiasiyası” İctimai Birliyində işləyib. Kəmalə Məmmədli bildirir ki, işlədiyi müddətdə maaşların verilməsində gecikmələrdən tutmuş, məzuniyyətə çıxan əməkdaşlara problemlər yaradılmasına qədər müxtəlif hadisələrlə üzləşib. Dediyinə görə, təşkilat qadın sahibkarların inkişafı və onların problemlərinin həlli məqsədilə yaradılsa da, son nəticədə bu qurumun rəhbəri Səkinə Babayeva oradakı qadınların özlərinə problemlər yaradırdı.
“Azərbaycanda Qadın Sahibkarlığının İnkişafı Assosiasiyası” İctimai Birliyinin rəhbəri Səkinə Babayeva
“Bu qurum qadın sahibkarlar üçün yaradılan platformadır. Bu platformanın məqsədi adında olduğu kimi “qadın sahibkarlığının inkişafına dəstək” göstərmək, yəni qadın sahibkarların dövlət və özəl təşkilatlar arasında körpü rolunu oynamaq idi, eləcə də regionda fəaliyyət göstərən qadın sahibkarların şəbəkəsini qurmaq və onların işlərini cəmiyyətə göstərmək, ümumiyyətlə qadın sahibkarların fəaliyyətinə dəstək olmaq idi. Orada çox yaxşı qadın sahibkarlar toplaşmışdı. İşini bilən üzvlərimiz vardı. Zaman keçdikcə yaradılan problemlərə görə ayrılıb getdilər. Çünki ortam sağlam deyildi”, – Kəmalə Məmmədli YeniZamantv.az-a açıqlamasında bildirib.
Kəmalə Məmmədli 2024-cü ilin iyulunda təşkilatdan çıxıb, avqustda isə Dövlət Əmək Müfəttişliyi Xidmətinə əmək hüquqlarının pozulmasından şikayət edib. Şikayətinə əməkhaqqı ilə bağlı bank çıxarışlarını da əlavə edib.
Dövlət Əmək Müfəttişliyi Xidmətindən Kəmalə Məmmədliyə gələn cavabda da təsdiqlənib ki, “Azərbaycanda Qadın Sahibkarlığının İnkişafı Assosiasiyası” İctimai Birliyi tərəfindən ona verilən maaş gecikdirilib. Hətta son əməkhaqqı o, işdən çıxandan və Dövlət Əmək Müfəttişliyi Xidmətinə şikayət edəndən sonra ödənilib. Bu isə Əmək Məcəlləsinin 172-ci maddəsinin 4-cü bəndinin pozulmasıdır. Bu səbəbdən də “Azərbaycanda Qadın Sahibkarlığının İnkişafı Assosiasiyası” İctimai Birliyinin vəzifəli şəxsi barəsində İnzibati Xətalar Məcəlləsinin 192.4 (işçinin əmək və məzuniyyət haqlarının, ezamiyyə xərclərinin, müavinət və digər ödənişlərin hesablanmasında və ödənilməsində qanun pozuntularına yol verilməsi) maddəsi ilə inzibati protokol tərtib olunub.
Bu günlərdə Səkinə Babayevanın rəhbərlik etdiyi tikiş sexinin fəaliyyəti ciddi qanun pozuntularına görə dayandırılıb: “Bir rəhbər qadın sexdə çalışan onlarla xanımın təhlükəli vəziyyətdə çalışmasına necə göz yuma bilər?”
Martın 12-də Fövqəladə Hallar Nazirliyi yanğın təhlükəsilə əlaqədar “Bakı Tekstil Fabriki” MMC-yə məxsus tikiş sexinin fəaliyyətinin dayandırıldığı barədə məlumat yayıb. Məlumatda bildirilir ki, nazirliyin Dövlət Yanğın Nəzarəti Xidməti tərəfindən Binəqədi rayonunda yerləşən “Bakı Tekstil Fabriki” MMC-yə məxsus tikiş sexində keçirilən yoxlama zamanı yanğın təhlükəsizliyi sahəsində çoxsaylı nöqsanlar aşkarlanıb. Həmin nöqsanların insan həyatı və ya sağlamlığına, ətraf mühitə və dövlətin əmlak maraqlarına birbaşa təhlükə yaratdığı müəyyən edilib.
Obyektdə ilkin yanğınxəbərverici siqnalizasiya qurğusu tam quraşdırılmayıb, həmçinin mövcud qurğuya texniki qulluq göstərilməyib; elektrik təsərrüfatı qaydalara uyğun quraşdırılmayıb və elektrik təsərrüfatına profilaktik baxış keçirilməyib; obyektdə yanğın su hovuzu mövcud deyil və daxili yanğın kranları quraşdırılmayıb; obyekt odsöndürən balonlarla tam təmin olunmayıb; təxliyə planı mövcud deyil; obyektin taxta konstruksiyalarına odadavamlı məhlul hopdurulmayıb; obyektin müəyyən yerlərində yanar üzlüklərdən istifadə olunub; istehsalat və anbar otaqlarında yanar materialdan istifadə edilərək otaqlar yaradılıb və s.
Qeyd olunanları nəzərə alaraq, yanğın təhlükəsizliyi norma və qaydalarının tələblərinin kobud pozulması faktları aşkar edilmiş “Bakı Tekstil Fabriki” MMC-yə məxsus tikiş sexinin fəaliyyətinin dayandırılması barədə qərar qəbul olunub.
