QHT-ləri gözdən salmaq üçün çirkin kampaniyalar aparanlar…bu cəhdlər zamanla özlərinə qarşı çevriləcək.
Ölkədə vətəndaş cəmiyyətinin inkişafı üçün illərlə çalışan, sosial problemlərin həlli yolunda əziyyət çəkən QHT-lər son dövrlərdə sistemli hücumlarla üz-üzə qalıb.
Bir tərəfdən, dövlət dəstəyindən sui-istifadə edən bəzi təşkilatlar QHT sektorunun adından istifadə edərək şəxsi maraqlarını güdür, digər tərəfdən isə trollar və müəyyən qruplar QHT-ləri gözdən salmaq üçün çirkin kampaniyalar aparır. Bu iki zərərli tendensiya vətəndaş cəmiyyətinin nüfuzuna ağır zərbə vurur.
Həqiqətən də, bu gün QHT sektorunda fəaliyyət göstərənlərin əksəriyyəti cəmiyyət üçün çalışan vicdanlı insanlardır. Onlar məhdud resurslarla ehtiyacı olanlara kömək etməyə, sosial problemləri həll etməyə çalışırlar. Lakin bəzi şəxslər bu sahədən sui-istifadə edərək yalnız maliyyə maraqları güdür. Belə təşkilatlar əsasən dövlət və beynəlxalq qurumların ayırdığı qrantları əldə edib, real iş görmək əvəzinə yalnız kağız üzərində layihələr həyata keçirir. Bu isə sektorun bütövlükdə gözdən düşməsinə səbəb olur. Əslində vətəndaş cəmiyyətini məhv edənlər təkcə onu qərəzli şəkildə nüfuzdan salmağa çalışan trollar deyil, həm də QHT adı altında fəaliyyət göstərən, lakin yalnız öz mənfəətini düşünənlərdir.
Digər tərəfdən, son dövrlərdə sosial şəbəkələrdə QHT-lərə qarşı məqsədli şəkildə aparılan qarayaxma kampaniyaları müşahidə olunur.
Müxtəlif saxta profillər, trollar, hətta bəzi media nümayəndələri QHT-ləri korrupsiyada, şəxsi maraqlarda ittiham edərək, onların nüfuzuna xələl gətirməyə çalışırlar. Təbii ki, sektor daxilində problemlər mövcuddur, lakin bu, bütöv vətəndaş cəmiyyətini qaralamağa əsas vermir. QHT-lərin əsas məqsədi sosial problemlərin həlli, hüquqların müdafiəsi və maarifləndirmə olmalıdır. Onları gözdən salmaq əvəzinə, fəaliyyətlərinin şəffaf və effektiv olması üçün nəzarət mexanizmləri gücləndirilməlidir.
Azərbaycan dövləti güclü hüquq-mühafizə sistemi, qanunun aliliyi və dövlətin maraqlarını qoruyan vətəndaş cəmiyyəti ilə güclənir. Dövlətin ən etibarlı qurumları, o cümlədən Prezident Administrasiyası, Baş Prokurorluq, Ombudsman və təhlükəsizlik qurumları vətəndaş cəmiyyətinin inkişafına mane olanları müəyyən edib qanun qarşısında cavabdeh etməlidir. Ölkənin maraqları üçün çalışan, sosial rifah üçün mübarizə aparan təşkilatlar isə hər zaman qorunmalı və dəstəklənməlidir.
Vətəndaş cəmiyyətini gözdən salanlar anlamalıdırlar ki, onların bu cəhdləri nəinki uğursuz olacaq, hətta zamanla özlərinə qarşı çevriləcək. Cəmiyyətin maraqları üçün çalışanlar bu çirkli kampaniyalara baxmayaraq, yollarına davam edəcəklər. Şəffaflıq, ədalət və ictimai maraq naminə çalışanlar həmişə qalib gələcək.
