ABŞ-ın Qafqaz regionuna təyin etdiyi nümayəndə – Lui Bono kimdir?

ABŞ Dövlət katibi Entoni Blinken çərşənbə günü xüsusi bəyanatla çıxış edərək diplomat Lui Bononu Qafqazda danışıqlar üzrə baş məsləhətçi təyin edib. Onun vəzifələrinə Ermənistan və Azərbaycan arasında sülh prosesinin irəliləyişini və Rusiyanın Gürcüstanın suveren ərazisinin iyirmi faizinin davam edən işğalını həll etmək daxildir.

YeniZamantv.az xəbər verir ki, Dövlət Departamentinin saytında dərc edilmiş bəyanatda Lui Bononun kimliyinə və vəzifələrinin əhatə dairəsinə geniş yer verilib.

Dövlət Departamenti qeyd edir ki, Lui Bononun bu cür danışıqları aparmaq üçün zəngin təcrübəsi var. O, Beynəlxalq Atom Enerjisi Agentliyində və BMT-nin Vyana ofisində ABŞ nümayəndəsi; Müqəddəs Taxt-Tacdakı müvəqqəti işlər vəkili olub; O, həmçinin Milli Təhlükəsizlik Şurasında Bəsrə Regional Ofisinin direktoru və dövlət katibinin müavininin müşaviri və dövlət katibinin iqtisadi və biznes məsələləri üzrə müavini vəzifələrində çalışıb. O, West Point və Ordu Hərbi Kollecində təlimatçı olduğu ordu ehtiyatlarından təqaüdə çıxıb.

Blinkenin bəyanatında qeyd olunub ki, “Birləşmiş Ştatlar Dağlıq Qarabağ münaqişəsinin uzunmüddətli siyasi nizamlanması da daxil olmaqla,  hərtərəfli sülh sazişi üzrə danışıqlarda Ermənistan və Azərbaycana kömək etmək öhdəliyinə sadiqdir. Cənab Bono Ermənistan və Azərbaycan arasında birbaşa dialoqu asanlaşdırmaq üçün həmfikir tərəfdaşlarla, o cümlədən Avropa İttifaqı və ATƏT kimi beynəlxalq təşkilatlarla ikitərəfli şəkildə məşğul olacaq”.

Dövlət Departamenti həmçinin vurğulayır ki, yeni diplomatik təyinat “ABŞ-ın Gürcüstanın suverenliyi və ərazi bütövlüyünə verdiyi əhəmiyyəti və Rusiyanın Gürcüstan ərazisinin 20 faizinin davam edən işğalına toxunan yeganə beynəlxalq format olan Gürcüstan üzrə Cenevrə Beynəlxalq Müzakirələrinin rolunu bir daha təsdiqləyir”.   /qaynarinfo.az/